Job 9

Then Job answered and said,

Lè sa a, Jòb pran lapawòl, li di konsa:

I know it is so of a truth: but how should man be just with God?

-Wi, mwen konnen se konsa sa ye. Men, ki jan pou yon moun ka gen rezon devan Bondye?

If he will contend with him, he cannot answer him one of a thousand.

Si li vle plede ak Bondye, Bondye ap mande l' venmil keksyon, li p'ap ka reponn yonn menm.

He is wise in heart, and mighty in strength: who hath hardened himself against him, and hath prospered?

Bondye sitèlman gen bon konprann, li sitèlman gen fòs, pa gen moun ki ka kenbe tèt avè l' pou yo pa peye sa.

Which removeth the mountains, and they know not: which overturneth them in his anger.

Li deplase mòn yo lè lide l' di l'. Lè li an kòlè, li voye yo jete byen lwen.

Which shaketh the earth out of her place, and the pillars thereof tremble.

Bondye fè tè a tranble kote l' chita a. Li souke poto ki soutni l' yo.

Which commandeth the sun, and it riseth not; and sealeth up the stars.

Li annik bay yon lòd, epi solèy la pa leve. Li fè zetwal yo pa klere lannwit.

Which alone spreadeth out the heavens, and treadeth upon the waves of the sea.

Li te pou kont li lè li t'ap louvri syèl la anwo tè a. Li mache sou lanmè a jan li vle.

Which maketh Arcturus, Orion, and Pleiades, and the chambers of the south.

Se li ki fè zetwal yo: Gwo Kabwèt la, Oryon, Lapousiyè ak zetwal Sid yo.

Which doeth great things past finding out; yea, and wonders without number.

Se li menm ki fè yon bann bèl bagay nou pa ka fin konprann, yon dal mèvèy nou pa ka fin konte.

Lo, he goeth by me, and I see him not: he passeth on also, but I perceive him not.

Bondye te mèt ap pase toupre m', mwen pa ka wè l'. Li glise kò l', li ale.

Behold, he taketh away, who can hinder him? who will say unto him, What doest thou?

Li pran sa l' bezwen. Pa gen moun ki pou enpoze l' fè l'. Pa gen moun ki ka penmèt yo mande l': Sa w'ap fè la a?

If God will not withdraw his anger, the proud helpers do stoop under him.

Bondye pa ka kenbe kòlè l' ankò! Li fè tout patizan Raab yo bese tèt devan li.

How much less shall I answer him, and choose out my words to reason with him?

Se mwen menm atò ki pou ta kenbe tèt avè l'? Se mwen menm atò ki pou ta plede avè l'?

Whom, though I were righteous, yet would I not answer, but I would make supplication to my judge.

Menm si m' te gen rezon, sa m' bezwen defann tèt mwen fè? Se li k'ap jije m', se padon ase pou m' mande l'.

If I had called, and he had answered me; yet would I not believe that he had hearkened unto my voice.

Menm si li ta reponn mwen lè m' rele l', mwen pa kwè li ta koute sa m'ap di l'.

For he breaketh me with a tempest, and multiplieth my wounds without cause.

Li rete konsa li kraze m' pou anyen. Li blese m' nan tout kò m', san m' pa fè anyen.

He will not suffer me to take my breath, but filleth me with bitterness.

Li pa ban m' tan pou m' pran yon ti souf menm. Li voye malè sou mwen yonn apre lòt.

If I speak of strength, lo, he is strong: and if of judgment, who shall set me a time to plead?

Mwen ta seye fè fòs avè l'? Fòs, se nan men l' sa ye. Mwen ta rele l' tribinal? Ki jij ki va voye manda ba li?

If I justify myself, mine own mouth shall condemn me: if I say, I am perfect, it shall also prove me perverse.

M' te mèt gen rezon, pawòl nan bouch mwen ap kondannen m'. M' te mèt inonsan, tou sa m'ap di ap ban m' tò.

Though I were perfect, yet would I not know my soul: I would despise my life.

Eske m' inonsan? M' pa menm ka di sa. Lavi pa di m' anyen ankò!

This is one thing, therefore I said it, He destroyeth the perfect and the wicked.

Si gen yon bagay m' ka di: inonsan ou koupab, se menm bagay. Bondye ap toujou detwi nou.

If the scourge slay suddenly, he will laugh at the trial of the innocent.

Si yon malè konmanse ap simen lanmò, inonsan te mèt ap rele, Bondye ri sa.

The earth is given into the hand of the wicked: he covereth the faces of the judges thereof; if not, where, and who is he?

Lè yon peyi tonbe anba men moun ki mechan, Bondye bouche je tout jij yo. Si se pa li ki fè sa, ki moun ki pou fè l'?

Now my days are swifter than a post: they flee away, they see no good.

Jou yo pase pou mwen pi vit pase dlo larivyè. Pa gen yonn ki ban m' kè kontan.

They are passed away as the swift ships: as the eagle that hasteth to the prey.

Yo kouri tankou bwa fouye sou larivyè, tankou malfini k'ap plonje sou ti poul.

If I say, I will forget my complaint, I will leave off my heaviness, and comfort myself:

Si mwen di: Bon. M' p'ap plenyen ankò. M'ap chanje figi m', m'ap fè yon ti ri,

I am afraid of all my sorrows, I know that thou wilt not hold me innocent.

soufrans yo vin pi rèd sou mwen. Mwen pè, paske mwen konnen pou Bondye mwen pa inonsan.

If I be wicked, why then labour I in vain?

Si m' antò, sa m' bezwen bat kò m' pou gremesi fè?

If I wash myself with snow water, and make my hands never so clean;

Pa gen dlo ki ka lave m'. Pa gen savon ki ka blanchi m'.

Yet shalt thou plunge me in the ditch, and mine own clothes shall abhor me.

Bondye voye m' jete nan yon pil fatra. Ata rad m' pa ka mete sou mwen.

For he is not a man, as I am, that I should answer him, and we should come together in judgment.

Men, Bondye pa yon moun tankou m'. M' pa ka diskite avè l'. Nou pa ka al lajistis.

Neither is there any daysman betwixt us, that might lay his hand upon us both.

Pa gen moun ki ka mete ola nan koze a. Pa gen moun ki ka jije m' ansanm avè l'.

Let him take his rod away from me, and let not his fear terrify me:

Pa gen moun ki ka kenbe men l' pou li sispann fè m' pè.

Then would I speak, and not fear him; but it is not so with me.

Men, mwen pa pè l'. M'ap pale, paske se mwen ki konnen sa ki nan kè m'.