1. Home
  2. Read
  3. Esperanto
  4. Ps.46

Psalms 46

46:1
Dio estas por ni rifuĝejo kaj forto, Helpo en mizeroj, rapide trovata.
46:2
Tial ni ne timas, eĉ se pereus la tero Kaj la montoj falus en la internon de la maroj.
46:3
Bruu, bolu Liaj akvoj, Tremu la montoj de ilia fiera ondado. Sela.
46:4
Estas rivero, kies torentoj ĝojigas la urbon de Dio, La sanktan loĝejon de la Plejaltulo.
46:5
Dio estas en ĝia mezo, ĝi ne ŝanceliĝos; Dio ĝin helpas en frua mateno.
46:6
Ekbruis popoloj, ekŝanceliĝis regnoj; Li sonigis Sian voĉon, kaj la tero fandiĝis.
46:7
La Eternulo Cebaot estas kun ni; Nia defendo estas la Dio de Jakob. Sela.
46:8
Iru, rigardu la farojn de la Eternulo, Kiu faris detruojn sur la tero,
46:9
Kiu ĉesigas militojn ĝis la fino de la tero, Rompas pafarkon, rompas ponardegon, Forbruligas veturilojn per fajro.
46:10
Cedu, kaj sciu, ke Mi estas Dio; Mi estas glora inter la popoloj, Mi estas glora sur la tero.
46:11
La Eternulo Cebaot estas kun ni; Nia defendo estas la Dio de Jakob. Sela.

© bibleglot.com